Khwab me mere kabhi tashrif layen Ghaus-e-Paak

Khwab me mere kabhi tashrif layen Ghaus-e-Paak
Mere khwabida muqaddar ko jagayen Ghaus-e-Paak

Apne paaye naaz ki barakat se kar ke mustafiz
Mere ghar ko bhi kabhi jannat banayen Ghaus-e-Paak

Koi qoowat usko duniya ki gira sakti nahin
Apne fazl-e-khaas se jis ko uthayen Ghaus-e-Paak

Ho gayi baab-e-ijaabat par rasaai unki bhi
Waaste se tere jo ki hai hain duayen Ghaus-e-Paak

Bahre Sarkar-e-Do Aalam ﷺ hum gharibon ki taraf
Bhej do abr-e-sakhawat ki ghatayen Ghaus-e-Paak

Aarzu rakhte hain hum ye Aap ke Darbaar me
Aap hi ki manqabat aakar sunayen Ghaus-e-Paak

Woh tasarruf Rab عَزّوَجَلْ ne bakhsha hai unhen ek aan me
Jis jagah chaahen wahan par aayen jaayen Ghaus-e-Paak

Chhu nahin sakti use Khurshid-e-Mahshar ki tapish
Woh jise Miftah daaman me chhupayen Ghaus-e-Paak

Leave a Comment